@:បន្ទាយមានជ័យ@: នៅថ្ងៃទី ១១/០៧/២០២៤ វេលាម៉ោង០៣:៣០នាទី កម្លាំងប៉ុស្តិ៍នគរបាលរដ្ឋបាលបឹងបេង បានទទួលព័ត៌មានពីម្ចាស់ផ្ទះឈ្មោះ ងឹម អ៊ុល អាយុ ៥៧ឆ្នាំ រស់នៅភូមិភ្នំរូង ឃុំបឹងបេង ស្រុកម៉ាឡៃ ខេត្តបន្ទាយមានជ័យ បានរាយការណ៍ថា មានករណីចោរចូលលួចទូរសព្ទដៃរបស់គាត់ចំនួន០៤គ្រឿង
បន្ទាប់ពីទទួលបានបណ្ដឹងភ្លាមលោកវរសេនីយ៍ឯក បេន សំអាត អធិការនគរបាលស្រុកម៉ាឡៃ បានដឹកនាំកម្លាំងក្រោមឱវាទ ចុះស្រាវជ្រាវ និងធ្វើការឃាត់ខ្លួនជនសង្ស័យបានចំនួន០២នាក់។
១.ឈ្មោះ អ៊ុន ឌីណា (ហៅហើម) ភេទប្រុស អាយុ ២៩ឆ្នាំ រស់នៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង
២.ឈ្មោះ ង៉ែត ឡូ (ហៅខា) ភេទប្រុស អាយុ៥៣ឆ្នាំ រស់នៅភូមិពោធិ៍ជ្រៃ ឃុំសិរីមានជ័យ ស្រុកសំពៅលូន ខេត្តបាត់ដំបង
ក្រោយពីធ្វើការសាកសួរ ជនសង្ស័យឈ្មោះ អ៊ុន ឌីណា បានសារភាពថាខ្លួនពិតជាបានធ្វើសកម្មភាពលួចជាញឹកញាប់ជាមួយបក្សពួកឈ្មោះ ង៉ែត ឡូ ដែលជាអ្នកឌុបខ្លួនលួចតាមផ្ទះជាប្រចាំពិតមែន
វត្ថុតាង និងសម្ភារៈដកហូតរួមមាន៖
- ទូរស័ព្ទដៃចំនួន០៣គ្រឿង និងកន្រ្តៃយ៍ដៃចំនួន០២
- ម៉ូតូហុងដាឌ្រីម ផលិតឆ្នាំ២០១៣ ពណ៌ខ្មៅស្លាកលេខ បាត់ដំបង 1Q 2589 ចំនួន០១គ្រឿង។
បច្ចុប្បន្នជនសង្ស័យទាំង ០២នាក់ខាងលេីត្រូវបានកម្លាំងជំនាញ នៃអធិការដ្ឋានកសាងសំណុំរឿងបញ្ចូនទៅកាន់ការិយាល័យជំនាញ នៃស្នងការដ្ឋាននគរបាលខេត្ត ដេីម្បីចាត់ការតាមនីតិវិធី៕
